Mewn cam trawsnewidiol tuag at lunio dyfodol sy’n cael ei sbarduno gan ynni cynaliadwy, mae CCR Energy a SSE Energy Solutions wedi dod at ei gilydd i arwain mentrau arloesol ar y safle ‘ynni gwyrdd’ 500 erw sy’n cael ei ddatblygu yn Aberddawan.
Mae’r cydweithio strategol hwn yn gam allweddol yn esblygiad y dirwedd ynni yn Ne-ddwyrain Cymru, gan addo nid yn unig adfywio amgylcheddol ond ffyniant economaidd hefyd.
Creu partneriaeth ar gyfer cynaliadwyedd amgylcheddol a ffyniant economaidd
Gyda gweledigaeth i arloesi datrysiadau ynni adnewyddadwy diogel, nod CCR Energy nid yn unig yw adfywio’r safle ond hefyd sbarduno creu cyfleoedd cyflogaeth amrywiol, gan sbarduno twf economaidd-gymdeithasol ar draws y rhanbarth.
Mae Cadeirydd CCR Energy, y Cynghorydd Bronwen Brooks, yn pwysleisio arwyddocâd y bartneriaeth hon o ran gwireddu potensial llawn safle Aberddawan: “Bydd y berthynas sy’n dod i’r amlwg gyda SSE Energy Solutions yn ein helpu i wireddu buddion ein hasedau a denu buddsoddiad yn y safle arloesol a chyffrous hwn sy’n canolbwyntio ar ynni.”
Yn unol ag ymrwymiad SSE Energy Solutions i ddatgarboneiddio a datblygu cynaliadwy, mae’r cydweithrediad hwn yn ymgorffori gweledigaeth ar y cyd o seilwaith ynni glân arloesol, gyda Carl Davies, Cyfarwyddwr Masnachol SSE Energy Solutions, yn dweud: “Ein nod yw bod y prif ddarparwr seilwaith ynni glân yn y DU. Mae’r cytundeb hwn gyda CCR Energy yn golygu y gallwn weithio gyda’n gilydd i gyflawni prosiectau gwyrdd arloesol, creu swyddi gwyrdd da – a chreu gwerth cymdeithasol yn Aberddawan ac ar draws de-ddwyrain Cymru.”
Cyfnod newydd o ddatblygu technolegol a stiwardiaeth amgylcheddol
Mae’r Memorandwm Cyd-ddealltwriaeth a lofnodwyd rhwng SSE Energy Solutions a CCR Energy yn nodi cyfnod newydd o ddatblygu technolegol a stiwardiaeth amgylcheddol – gyda’r ddwy fenter yn gallu gosod cynsail ar gyfer datblygu cynaliadwy yn y rhanbarth.
Ac wrth i ni gychwyn ar y daith drawsnewidiol hon, mae’n gyffrous gwybod bod SSE Energy Solutions yn uno â ni yn ein hymrwymiad i sbarduno cynnydd, meithrin arloesedd, a siapio dyfodol gwyrddach a chadarnach am genedlaethau i ddod.